الله يعين يلي ما الو حدا…
يلي مالو حدا بيضيع حقو، وبعيش ربع عمرو، وبيموت من قهرو
يلي مالو حدا ما فيه يجادل عامل استعلامات بمؤسسة حكومية
ولا فيه يسأل عن طبيب بمشفى أو ممرض بعيادة
ولا فيه ينتظر على باب مسؤول درجة عاشرة
ولا فيه يتأفف من طوابير الخبز ودفع الفواتير
ولا فيه يعلي صوتو حتى على سائق باص نقل داخلي ما نزلو على موقف
ولا فيه يقول إنو المي ما بتجييه، وأنو الكهرباء عندو جيرانو ما يتنقطع، وأنو مديرو في الشغل بياكل حقو
يلي ما لو حدا ما فيه يطلع بطرف عينو بسيارة مفيمة، ولا يمشي بجنب مخفر، ولا يكتب كلمة لمدرسة ابنو
يلي ما لو حدا طول عمرو بيضل خايف، مهموم، بحسب حساب لكل رنة تلفون، ودقة باب، ودعسة درج
عم بالغ…. لا ما عم بالغ
كلنا بنراجع مؤسسات حكومية وبنشوف ضريبة يلي ما مو حدا
كلنا بنوقف بطوابير الخبز ودفع الفواتير، وبنشوف التنمر على أصولو من اليمين واليسار
كلنا بنمشي بالشوارع وبنسمع المسبات والإهانات من الزنار ونازل
كلنا فكرنا نشتكي، وبالأخير قلنا بلاها ما لنا حدا
حتى اذا فكرنا نطلع من البلد ما بنسترجي نقول لحدا
ورغم هيك راح قول:
صحيح مالنا حدا…. بس عنا شوية أمل يصير النا حدا
