باتت حكمة السوريين المفضلة هذه الأيام هي:
– معك مصاري بتعيش وتجيب يلي بدك ياه
– معك مصاري بتعبي مازوت وبنزين وغاز قد ما بدك
– معك مصاري ما بتهين نفسك لتحصل على ربطة خبز
– معك مصاري ما بتصيبك ضربة شمس وأنت ناطر باص أو سرفيس لتروح على شغلك أو ترجع على بيتك
– معك مصاري ما بتكون مضطر تطعمي ولادك أكل مغشوش كلو نشا وملونات وجراثيم
– معك مصاري ما بتضطر تأكل تفاح دبلان وعنب مضروب وبندورة مهرية
– معك مصاري راح تاكل كاجو وزبيب ولوز وجوز، وتعمل كبة مشوية ولبنية ومقلية ونية
– معك مصاري ما رح تنتظر رسالة السكر الأحمر والرز تبع النخب الرابع
– معك مصاري ما رح يروح ابنك على مدرستو بلا سندويشة أو جاكيت يدفيه أو لابس شحاطة برجلو
– معك مصاري ما رح تتدين أو تبيع شي لتبعتو على مدرسة أفضل
– معك مصاري ما راح تسكن بأماكن الكلاب يلي بتمشي بشوارعها أكثر من البني آدميين، ومستنقعات الشتا فيها أكبر من بحيرات السدود يلي دراسونا ياها بالجغرافيا
– معك مصاري الكل بحترمك وبيقدرك وبيتمنى خدمتك بالقانون وفوقو وتحتو
– معك مصاري ما راح تصير تشوف أهلك بالسنة مرة لأنو السفر لعندهم صار بدو ميزانية
– معك مصاري راح تصير تشوف البحر والجبل والمطاعم أكتر من بيتك
– معك مصاري ما راح تموت إلا شب وأنت بعمر السبعين والتمانين
– معك مصاري أكيد ما راح تكون عم تسمعني بهالوقت
دمتم فقراء بلادي بألف خير
